السلام عليكم ، أنا هاشم علي هاشم خريج قسم علم النفس جامعة عين شمس و جاي أتكلم في المقال دا عن تجربتي في القسم و إزاي قدرت أحسن تقديري في آخر سنة و نص .
القصة بدأت لما خلصت ثانوية عامة و ساعتها أنا كنت مقرر من البداية إني أختار علم النفس و فعلا مرت الأجازة و دخلت القسم و كنت مبسوط أوي و كانوا الدكاترة و زمايلي في القسم ملاحظين إني عندي إطلاع كويس في المجال و لكن آدائي الأكاديمي كان متوسط و دا كان مسببلي إزعاج لإني كنت عارف إني ممكن أجيب أحسن بس مكنتش عارف السكة إزاي و فضلت كدا لمدة سنتين و نصف . لحد أما حصلت حاجة مفصلية غيرت مستوايا الدراسي بشكل كبير و هي " رسوبي في مادة مقاييس شخصية واحد " ،
ساعت النتيجة زعلت و غضبت و كنت حاسس باليأس و إني مظلوم و شغل الطلاب اللي إحنا عارفينه دا . المهم دخلت الترم اللي بعده و حاولت أعالج نقط ضعفي في المذاكرة و النتيجة كانت مفاجأة بالنسبة لي و هي إني جبت جيد جدا مرتفع في الترم دا و دي عمري ما جبتها قبل كدا ولا قربت منها حتي ، المهم نخش بقي علي التحدي الأهم و هو دخول مادة مقاييس في السمر ،
في خلال أول أسبوع عرفت إن أنا سبب رسوبي في المادة عشان مكنتش بركز وقت المحاضرة و كمان كانت قرآتي للمادة سطحية و عابرة و سد خانة ، و كمان أهم الحاجات اللي موضع سؤال لا كنت فاهمها ولا كنت حافظها يعني مكنتش مذاكرها أساسا . و لكن السؤال هنا إزاي قدرت أتغلب علي المشاكل دي ؟
ببساطة كنت بحضر المحاضرة في معادها و كمان كان كل تركيزي علي كلام الدكتور في المحاضرة في الساعة اللي بتشرحها كنت بتعرف علي الكلام المهم و أكتبه في الكشكول لأن دا الزيتونة اللي ممكن ييجي منها أسئلة في الإمتحان و كنت لما أرجع البيت أذاكر كنت أكد عليها و بعدين أدخل علي كتب المادة نفسها و أتصفح كل اللي الدكتور قالت عليه مقرر علينا بس مش كدا بس و أنا بقرأ كنت بلاقي حاجات لازم تيجي موضع سؤال و حاجات تانية لا و الحاجات اللي كانت تيجي موضع سؤال دي كنت بفهمها و أحفظها كويس أوي عن طريق إني أقرأها بصوت عالي و بعدين أسمعها و أشوف إيه اللي إتحفظ و إيه اللي محتاج يتعاد عليه .
و في الآخر كانت النتيجة بعد توفيق ربنا و تعبي إني جبت امتياز في المادة و دا طبعا كان مفرح بالنسبة لي ، و لكن لما دخلت سنة الليسانس قولت لازم أطبق كل اللي أتعلمته الفترة اللي فاتت ، و لما عملت كدا حصلت علي مرادي و جبت امتياز في سنة الليسانس و اتخرجت علي خير الحمد الله .
الخلاصة هي إن ما يقع إلا الشاطر و إن لكل جواد كبوة ، و خليك فاكر إن الطالب الشاطر الحقيقي هو اللي يعرف يتكيف مع أي نظام تعليمي سواء كان قائم علي الحفظ و التلقين زي عندنا أو لو في أحسن جامعات العالم .
تاريخ الحدث: 29/12/2023