أنا أسمهان أحمد الغرباوي طالبة في كلية الآداب قسم علم النفس السنة الاخيرة وانا هنا في الكلية دي بعد ما كنت أكتر حد يقول مستحيل ادخل آداب ...دي لو اخر كلية في العالم مستحيل ادخلها مش من قلة الكليات وكنت بحلم وبجتهد بكل مجهود عندي اني ادخل كلية الصيدلة في ثانوية عامة وكانت نهاية الكون ونهاية كل حاجة حلوة لو مدخلتهاش ولو ربنا كرمني بيها فانا هكون وصلت لأكتر حلم حلم بيه في حياتي وطبعا زي ما اغلبنا جرب لازم يحصل حدث محوري في حياتك وانت في ثانوية عامة وانا الحدث بتاعي كان وفاة انسانة من أقرب البشر ليا في حياتي "جدتي" ربنا يرحمها ويجعل قبرها روضة من رياض الجنة ويجمعني بيها على خير واتوفت ليلة امتحان الكيميا (اه اصل انا كمان كنت علمي علوم) لحظات من توقف الزمن مرت عليا بوفاتها بس روحت الامتحان وقررت اكمل للاخر مانا عندي حلم بردو واللي كان ساعتها علاج طبيعي علشان اساعد اللي يتعب زي جدتي ويشاء ربنا اجيب مجموع يدخلني اي كلية الا كليات "القمة" وانا بنفسي اصر تمام الاصرار مدخلش اي حاجة تانية غير آداب علم نفس لاني كده كده بحب علم النفس وبعد عياط كتير وتفكير دائم اني هكون لوحدي طول الاربع سنين ربنا كرمني بصديقة هي اختي حاليا ومجموعة صحاب هما اقرب ناس ليا وكانت الكلية بداية اني لأول مرة مكنش لوحدي اما عن الكلية فانا مش ببالغ لما اقول اني بعشق الرمال بتاعتها لاني فعلا لقيت فيها نفسي وساعدني في ده مجموعة دكاترة ومعيدين انا عارفة انه اي كلية مستحيل يكون فيها ناس حلوين كده ومحترمين وبيحبونا ومش بيقللوا مننا علشان احنا طلبة حقيقي انا بشكرهم كلهم على رحابة صدرهم ودعمهم المستمر حقيقي صحابنا واخواتنا مش بس دكاترة وانه فعلا لازم تستفيد منهم لانهم مش هيدخروا عنك معلومة . يا صديقي لو انت حاليا في كلية آداب عين شمس قسم علم النفس فانا عايزة اقولك ان دي من أكبر النعم اللي ربنا ادهالك بطل عياط على اللي فات وشوف رزقك ومتضيعش الفرصة من ايدك..jpg)
.jpg)