حلم يسرده عليكم مازن محمد عبد العزيز
هشارك معاكم حلمي الي دخلت القسم عشانه ، بس المختلف اني مش هشارك مجرد امال نفسي تكون حقيقة او الي كدا كدا متوقع من اي حد هنا ، لا حاجة بدأت فيها من قبل ما اعرف محتاج ادرس ايه عشانها او ازاي ممكن تتحقق وده المكان الي هيخليها تطلع بأفضل طريقة ممكنة مع باقي الحاجات الي اتعلمتها وهيخليني اقدم ده من بعيد لكل الناس ومن قريب بصوره شخصية واحس بتأثيره الايجابي في وقته
لما بقيت اتابع محتوى تطوير الذات عشان بس كان بيظهرلي زي اي فيديوهات بتتقدم على اليوتيوب ماكنتش اعرف انه ممكن يغير عقليتي للابد
تشوف كام فيديو تلاقي مشكلتك مع الانجليزي اتحلت وبقيت بتتابع فيديوهات الانتاجية زي ما انت بس بالانجليزي
تشوف كام فيديو تانيين تلاقيك عرفت تنظم وقتك وفهمت معنى حياتك ومحتاج تعمل ايه فعلا مش الي حواليك بيقولولك تعمله على قد عقليتهم
تشوف كام فيديو تاني تلاقيك اتعلمت مهارات زي الرسم ومونتاج والتصميم وتقدر تعبر عن نفسك بيهم او تكسب منهم فلوس ( زي ما حصل معايا فترة قبل ما اوقف )
وتلاقي وقتك وحياتك بقى ليهم معنى اكتر وتبدأ تفكر انه ازاي حاجة بسيطة تتكعبل فيها صدفة ممكن تخليك نسخة افضل من نفسك وازاي مفهوم الانتاجية الي اجتاح الفترة دي مع صناعة المحتوى والسوشيال ميديا مش بيفرق بين حد والتاني
لغة ، دين ، عرق ، جنس مش بتفرق الي فارق عقليتك والي تقدر تقدمه
وبمهارتك وعقليتك بس تقدر تقدم خدماتك وافكارك لاي حد في اي دولة
وكل الي انت محتاجه عشان تتطور انك تتكعبل في حاجة تساعدك وتشيل القفل الي حاطه على دماغك عشان تقدر تستوعبها
ففكرت ليه مايكونش فيه كيان بيقدم وبيعمل تغيير حقيقي بصورة اكبر واوضح من دي واي حد يقدر يوصله في اي مكان ومجانا
عشان ماتكونش الانتاجية حكر على ناس معينين
لو الواحد مات بعقلية تعميه عن الحقيقة ومش شايف غير الي عقليته سمحاله يشوفه هل كدا هيبقى عاش في نفس العالم الي كلنا شايفينه وحاسين بيه كامل وهو لا ؟ ولا عاش بس في عالم متشكل على حدود تفكيره وعقليته ؟
فبدأت اعمل موقع على قد امكانياتي
قسم الدعم النفسي ، اي حد يقدر يشارك رحلته وحلمه ومشاكله ونتبادل خبرات بعض طبعا مع اشراف المختص ( الي لسة انا طبعا بس ) ونصايحه الي هي كل الي احنا بنتعلمه وهنتخرج عشان نكونه بس المفاجأة انها ممكن ماتكونش بفايدة حد مر بنفس الخبرة في نفس المجال مثلا وقاله على السر في تعليق جنب تعليق المرشد والمعالج النفسي
وجروبات دردشة الالتزام بالعادات ، العادة من اقوى العوامل الي بتساعد في العلاج النفسي او الوصول لاي هدف وبالبساطة دي لو الموضوع منظم ومتتابع مع الاخصائي النفسي على موقع متخصص اي حد يقدر يوصله وان كل عادة الي محتاجين يبنوها او يتخلصوا منها في جروب خاص بيها في الموقع متنظم وبيسجلوا تقدمهم وبيشجعوا بعض ، الموضوع هيكون سهل انه يتحقق ويفيد اي حد حتى لو من بعيد
جنب طبعا الاستشارات والحاجات الي بتكسب دي ( والي بيطلبوها هيكون ليهم اولوية في باقي الخدمات ومتابعة خاصة في العادات الي بتتسجل وباقي المشاكل الي بيتعرضولها في قسم الدعم النفسي غير مشكلة الجلسة الاساسية في اي وقت في اليوم وطبعا المحتوى المبسط المجاني الي بنعمله ( الي لوحده كان كفاية ليا شخصياً يغير حياتي للاحسن شوية ) عشان نوصل اكبر عدد ممكن من الناس لافضل نسخة ممكنة من نفسهم وانهم يفهموا نفسهم واهدافهم بشكل افضل وهيكون ليهم وصول مسبق للمحتوى ولدورات تدريبية مخصوصة ليهم )
ده عشان بس مافيش حاجة ممكن تكمل بشكل مجاني تماما وفي ناس بتحتاج مساعدة اكبر بكتير
الي اتحقق من ده الموقع طبعا استضافة مجانية واتعمل بمنصة من غير برمجة بس كافي ولما ينجح ده هيتغير
وكام فيديو على قناة اليوتيوب بمونتاج معقول
واني لسة في مستوى تاني فما اعرفش لسة غير القشور
بس اهي بداية افضل من ولا حاجة ، اكيد ده هيشجعني اكمل على مسار المعالج النفسي للاخر وانا بادئ في حلمي الاساسي فعلا وهتأكد اني اكون مؤهل ليه بدراستي كمرشد ومعالج نفسي للاخر ان شاء
كل الي حابب اقوله تقدروا تستفيدوا من كل ده على قد الي قادر اعمله دلوقت
الموقع :
www.bit.ly/1creativity1
قناة اليوتيوب :
https://www.youtube.com/@1Creativity
قناة الواتس :
https://whatsapp.com/channel/0029VazS9357j6gGBN11Dj0p
وانك لازم تفضل تفكر في حلمك وتخليه قصادك يا اما هتحس انك بس بتعمل الي مضطر تعمله وخلاص ويادوب محتاج تنجح
ممكن نتكلم اكتر في المنتديات ودردشة الموقع ، مستنيكم هناك
إعلان كرياتيفيتي